Jeff Bezos net worth as CEO of Amazon don reach $171bn (£137bn) as di American business magnate make tens of billions during di Covid-19 pandemic.
One study wey one content and comparison site, Comparisun, wey dey help organisations compare different business products do, say Bezos wey be di founder of di E-commerce company fit become di world first trillionaire as early as 2026.
“Despite say im don lose like $38 billion as part of wetin im take settle for im recent divorce, Bezos na still by far di world richest pesin and im net worth don grow by 34 per cent on average over di last five years and im fit become di world first trillionaire as early as 2026 wen e go clock 62.” Comparisun tok.
Dis report don cause debate for social media as pipo dey react to di tori.
Who be Jeff Bezos?
Jeff Bezos na di founder and CEO of e-commerce company Amazon, im be di owner of di Washington Post company and founder of di space exploration company Blue Origin.
Oga Bezos na pikin wey quick develop special abilities for early age.
For age 3, Bezos sabi how to use screw driver to comot nails from im baby cot because im wan make e be like real bed.
Im develop engineering skills at a very early age as im set up electronic alarm to younger siblings out of im room.
For age 10, im grandma begin cry wen Bezos calculate for am how many years she don reduce for her age sake of smoking.
Pipo dey see Besoz as pesin wey care more about cleverness than kindness and di way im dey grow im company, Amazon.
Di Amazon.com CEO na pesin wey like numbers and im dey always make am do things differently.
Im successful business dem don make am one of di richest pipo for di world, with $145 billion dollars as im net worth as at 2020.
Dem born am for New Mexico for 1964, Bezos early love of computers make am study computer science and electrical engineering for Princeton University.
Afta im graduate for 1986, Jeff work for Wall Street, and for 1990 im became di youngest senior vice president for di investment firm D.E. Shaw.
Four years later, Bezos resign from im job to open Amazon.com, one online bookstore from im garage. Im parent give am $300,000 to invest for di company.
Bezos bin warn pipo wey invest for di business say 70% chance dey say di business fit fail.